Почитувани сограѓани, во идните четири години, ја продолжуваме успешната мисија која ја започнавме, Преспа да ја направиме убаво место за живеење за нас, но и за нашите идни генерации. 

Преспа е аманет оставен од мојот татко, кој ги постави темелите на Специјализираната болница за превенција, лекување и рехабилитација на респираторни заболувања во Отешево, а како градоначалник, во голема мера придонесе за развојот и афирмацијата на нашата општина. Аманет за поубава Преспа ми се и моите четири деца, кои сакам да продолжат да живеат, работат и творат во родното место. Тука да ја гледаат својата иднина. Недопрената природа, туризмот и надалеку прочуеното преспанско јаболко да бидат основата за понатамошниот развој на нашата општина. Да креираме и создаваме, на секој можен план, и зад нас да оставиме дела со кои ќе се гордеат и нашите идни генерации.

Предизвикот во овие изминати четири години беше огромен, пречките беа огромни, но мотивот ЗА Подобар живот за сите во Преспа, беше над сѐ и пред сѐ! Заедно го продолжуваме патот што носи успех и кој заеднички го започнавме пред 4 години. Продолжуваме токму онака како што ветивме, транспарентно, чесно, со многу работа и многу труд. Капиталните проекти што ги оставам зад мене ќе сведочат за успешноста, транспарентноста и работата во интерес на сите жители на Општина Ресен. Преспа не треба да се дели на наша, ваша, нивна, Преспа е на сите и сите заедно ќе продолжиме да ја градиме, без разлика на верска, национална и политичка припадност.

Овие четири години докажавме дека со напорна и чесна работа обезбедивме подобар живот за сите. Сега предизвикот пред нас е уште појак, а мотивот за работа и за успеси се уште поголеми. На 17 октомври излегуваме и гласаме за најдоброто за нашата општина.

Со ваша поддршка, верувам дека ќе продолжиме таму каде што на кратко застануваме, да ја направиме Преспа пристојно место за живеење, да го реализираме и тоа што сега треба да се направи за подобрување на условите за живот во нашата преубава Преспа.